Glosario

Bibliografía

A democracia ateniense dos séculos v e iv a. C. é o exemplo máis famoso e quizais o máis perfecto de democracia directa. Cubrindo o período 403-322 a. C., Mogens H. Hansen céntrase nos cruciais últimos trinta anos, que coincidiron coa carreira política de Demóstenes, analizando as sete institucións políticas da cidade: a Asemblea, os nomothetai, o Tribunal Popular, as xuntas de maxistrados, o Consello dos Cincocentos, o Areópago e os ho boulomenos. Describe como concibiron os atenienses a liberdade, tanto como capacidade de participar no proceso de toma de decisións como o dereito para vivir sen a opresión do Estado ou doutros cidadáns. Examina a democracia ateniense como sistema político e como ideoloxía. Ao describir o primeiro, distingue entre os tres principais órganos de toma de decisións —a Asemblea, os lexisladores e os Tribunais Populares—, e os maxistrados responsables de preparar a axenda da lexislatura e de levar á práctica as súas decisións. Ao discutir a ideoloxía democrática ateniense, o libro tamén fai unha distinción importante entre os ideais dos demócratas mesmos e os que lles imputan os críticos da democracia.